歐美股市再創新高，但內地股市卻持續偏軟，上證綜指再跌25點至2217點，惟2200點的防守力仍算硬淨。恒指高開144點之後反覆橫行，10天線(23000點)有強大支持力，多番回吐下試不破，收市報23044點，升113點；大市成交549億元，略見萎縮，值得注意的是，沽空金額回升至60.5億元，空軍有初步建倉的跡象。

　　中資金融股昨日反彈，恒生中國H股金融行業指數升0.7%，係支撐大市的主要力量。「九行七保」除重農行(3618) 及太平保險(966) 逆市跌2.1%及0.5%外，其餘靠穩。申銀萬國調研統計顯示，5月首12日，四大行信貸投放約800億元人民幣，符合正常月初投放節奏。市場預期內地銀行5月整體新增貸款或回升至約9000億元，保持平穩，6月會上升。

　　無獨有偶，昨日表現最好的兩隻都係同歐美市場有關的股份。利豐(494) 勁升8.4%至11.16元，而思捷環球(330) 漲5.8%至11.28元。利豐價量齊升，主要原因係執行主席馮國綸表示，今年首幾個月公司業績符合預期，尤其是物流業務年初至今已增長30%，加上今年盈利貢獻集中於下半年，有信心公司全年核心經營溢利可回復至2011年大約9億美元水平。佢係唔係做到，真係要睇過至知啦。

　　買利豐不如買匯豐

　　思捷環球大升的原因卻有些不明所以，思捷昨在德國舉行投資者會議，摩根大通指思捷行政總裁馬浩思所述的指引及策略與之前的相若，沒有太大驚喜，儘管政策方向正確，但最終能否成功，仍言之尚早，因為執行上仍存不明確性。而馬浩思對今年至2016財政年度的毛利率及銷售更為保守，將重點轉向控制營運成本，資本開支及內地擴張步伐將受限，故維持「減持」評級，平均下調2014至2016年盈利預測20%，目標價由6.8元降至5.7元。

　　大行唱衰，但股價卻大幅反彈，在兩者之中，利豐好過思捷啲，因為思捷面對的市場已大變，完全未知佢轉唔轉到型。但買利豐又不如買匯控(005) ，因為匯豐又來大裁員，未來保持12至15%股本回報率，又話會回購，等佢回吐時買，好似前景仲清晰啲。

　　港股近期表現疲弱，主要被內地A股拖累。美國銀行美林的月度全球基金經理調查顯示，市場普遍認為中國經濟放緩以及商品價格崩潰，可能會取代歐債危機，成為全球投資者的頭號擔憂。受訪的231位基金經理有25%認為中國經濟硬着陸是頭號「尾部風險」(Tail risk)，遠高過4月的18%。所謂「尾部風險」，係指價格呈現極端大幅波動的風險。

　　李克強暗示不救市

　　內地經濟較弱，4月工業生產和投資數據皆未達標，美銀和摩根大通本周已將今年中國經濟增長預測下調到7.6%，當外界期望阿爺出招刺激經濟時，總理李克強暗示中央不願推刺激政策，佢在本周一話：「要實現今年發展的預期目標，靠刺激政策、政府直接投資，空間已不大，還必須依靠市場機制……若倚賴政府主導的投資來刺激成長，不僅難以為繼，甚至還會產生新的矛盾和風險」。

　　李克強的意思是要靠民間投資帶動經濟，主要針對一些壟斷性行業去改革，佢話中國必須在金融、電訊、物流、醫療和教育方面打破「行政性壟斷」，以強化服務業成長，這些行業「市場准入的門檻」較高甚至很高，而這些恰巧都是「發展潛力巨大的產業」。

　　阿爺的講法可以引申出兩方面的推論，第一，在外資眼中，中國變成風險而不是機遇，人哋咁睇淡中國，中國又唔會馬上大泵水救經濟，港股暫時未有大突破的條件。第二，李總理點的金融、電訊等市場，而家都是由大國企主導，若阿爺大手筆開放市場，這些巨企必將受損，所以唔好將電訊、內銀股睇成為永不沉沒的航空母艦，攬住唔放，要不時睇住佢哋點發展，好老土咁講「高沽低揸」，唔好死揸不放。

　　陸羽仁