港股借工行(1398) 被減持的消息回調，內銀股繼續受外資大行及沽空機構狙擊。繼摩根大通早前唱淡A股和建議沽空四大國有銀行，上日高盛以每股5.47元至5.5元(與上日收市價折讓2.5%至3%)盡沽手上工行H股，套現約11億美元。

　　高盛2006年買入共25.8億美元股份，持貨七年，分6次散貨，埋單共套現約97億美元，大賺71.2億美元(約552.63億港元)或2.76倍，認真和味。高盛今年已經係第二次沽出工行股份套現，在今年1月28日工行見頂時，高盛以每股5.77元沽售工行10億美元股份，隨後工行股價開始回落，有分析揣測高盛沽貨，是工行新一輪升浪完結的訊號。由於內地A股尾市回靠，恒指跌近23300點已見支持，連續多次下試都頂得住。恒指收市跌126點，報23366點；國企股表現較弱，國企指數跌103點至11083點。

　　高盛沽工行大賺

　　有外電報道月初唱淡及沽空渣打(2888) 的沽空機構渾水(Mud Water)，將矛頭直指內銀股，指中國銀行劣質貸款的潛在範圍被大幅低估。

　　最近兩隻大型新股銀河證券(6881) 和中石化煉化(2386) 排在今、明兩日上市，中環茶友兩隻都有認購，據佢獲派貨的幅度計，銀河證券明顯熱啲。

　　銀河證券公佈招股公開發售部份超額認購約29倍，回撥後公開發售股數佔比由10%升至30%，一手(500股)中籤率係100%，定價5.3元。昨日黃昏銀證新股的二手成交價約5.64元，比招股價高6%以上。茶友見銀證派出街貨咁少，相信有大戶圍咗貨，估計可以炒高啲，雖然有人睇6元，佢就話升10%去到5.83元佢都好滿意。

　　內地證券股PE高

　　內地證券股向來是炒家樂園，唔理有無升幅，起碼有波幅，以中信證券(6030) 為例，去年12月低位仲係14.06元，但個幾月後今年1月尾高位可以上到21.4元，高低差52%，炒完急回，同行海通證券(6837) 同樣由12月低位升到1月高位，高低差48%，同樣炒完急回，可見證券股炒得幾勁。中信證券現價17.58元，市盈率36.7倍，海通現價11.36元，市盈率都27.6倍。內地炒股高手都喺度炒番自己的證券股，唔大上大落就奇啦，20幾、30幾倍市盈率，呢個價若唔係炒得過份，就係預咗今年盈利會大升，但今年上半年都過咗大半，內地證券行家都唔係覺得上半年市道唔係咁好，全年都唔敢預得太好，所以證券股價咁高都係炒作為主。

　　茶友講番銀河證券，話佢走唔出內地股市未恢復的大局，睇長線唔係咁好，但唔等如上市唔炒得，佢市盈率約17.7倍，升一成到5.83元都係19.4倍，都係過中信、海通，加上銀河證券未上A股，估佢都想H股做好啲爭取上A股。

　　呢啲股好炒唔好揸，上市之後炒一輪，人哋升咗畀機會你食胡，你唔食就老襯啦，特別係認購咗一手的股東，即使賺5嚿水都走啦，唔係放一年半載隨時唔見一截。

　　陸羽仁