港股真係弱得交關，亞洲上日爆小型股災，恒指以為跌得最甘，昨日會彈吓，港股朝早跟大圍反彈，最多升過200點，可惜一彈即散，午後一瀉如注。收市倒跌58點至19200點，繼續跑輸中日韓股市。市場開始憂慮恒指50天線正逐步逼近250天線，形成「死亡交叉」，兩線相差只有約200點，去年8月出現「死亡交叉」後，大市跌到阿媽都唔認得，今次又咁邪？

　　昨日係恒指第10陰，過去11個交易日只有前日(周二)彈過159點咁大把，其餘10日都係陰跌。阿爺出265億搞節能家電，內地股市反彈，升1.4%，港股卻跌0.3%，完全唔跟阿爺升。

　　家電股收禮物獨升

　　阿爺的招數來到香港只好似局部地區性驟雨，只有家電股得，國務院政策有利空調、平板電視、電冰箱、洗衣機等家電及LED節能照明產品，相關股份逆市爆升，其中創維數碼(751) 升11%。

　　港股特弱，中環茶友解釋，除了有淡友興風作浪之外，主要係有基金大手沽貨，佢哋既怕歐債危機，又想班師回朝，亦擔心中國和香港經濟急促放緩，所以先沽為妙。街外睇中國經濟真係睇得好差，慢慢成為一個主題，瑞銀首席經濟師汪濤就話，因為4月內地經濟數據差過預期，將國內第二季GDP增長由原來的8.4%下調至8%，全年增長則由8.5%下調至8.2%。我估證券行下調中國經濟增長預測陸續有來。

　　基金愛股就遭殃，例如一直好受芬佬歡迎的領匯(823) 亦成沽售對象，前日收市就有機構投資者以每單位28.55元至29.17元出貨，作價較前日收市價折讓5％至7％，套現19.5億元。領匯昨日插4.4%，收29.35元。領匯過去一枝獨秀，因為環球通脹，房產基金派息好特別受歡迎，領匯高位32.4元，現價跌咗都只係比高位低9%，由於持貨者多數有厚利，所以引人沽佢套現。

　　基金佬一見彈就沽

　　另外你睇內銀內險股，過去10日一直畀人密密沽，好似國壽(2628) ，連日畀人大手咁質，一級級咁跌落來。

　　中環茶友提醒大家，即使希臘唔馬上爆驚人大鑊，個市都隨時反覆跌到6月底，而家係5月中，基金開始擔心半年結盤數，所以會等反彈沽貨鎖定利潤，有利半年結時交盤好數，咁個市落去沽壓不輕，唔係話個市唔會彈，但彈三幾百點，都好易成為基金出貨機會，變成易跌難升。去年11、12月都係咁，芬佬唔想揸咁多貨到年底，踏入11月後一見個市升就沽，要等到過完年底個市才有起色。

　　若然估計正確，大家唔好太心急撈底，因為即使定番啲，彈少少都係橫行，反而衰起上來向下尋底的機會唔細，插落去好多優質股都好抵，但芬佬亦唔敢買住，只有散戶入貨，令購買力減弱。

　　內地零售股慢慢都生意難做，百貨公司百盛集團(3368) 公佈第一季度業績，銷售總額按年增長6.5%，但經盈利潤下跌12%，純利倒退5%至3.12億元。百盛解釋首季同店銷售放緩，主要因為開設7至8間新店，每間店舖費用約3000萬至4000萬元，成本大幅增加。瑞銀認為，內地百貨公司已供應過剩，新店需較長時間才可首只平衡，預期百盛今年餘下時間仍將延續弱勢，將目標價由10元降至8元。做內銷都係咁，何況做出口的公司？

　　陸羽仁